
أنا (ضحكت بوجع): “غيرانة؟! أنا أشفق عليها وعلى تفكيرها، وأشفق عليك عشان مش شايف غير مصلحة أختك اللي رمت عيالها عشان “راجل”.. فين كرامتك كخال؟ وفين حقك كأب لسه ابنه مشافش النور؟”
فجأة.. الجرس رن خبطات متتالية، قوية، كأن اللي بره عايز يكسر الباب.
ولاء صرخت: “ده طارق! يا مصيبتي.. ده هيحرم من العيال، أحمد والنبي ما تفتح!”
أحمد بصلي بغل وراح فتح الباب.
دخل “طارق” طليق ولاء، وراه اتنين عساكر وأمين شرطة.
طارق (بصوت جهوري): “فين ولادي؟ فين اللي كانت عايزة تهرب بيهم وتتجوز وتسيبهم عند الغرب؟”
ولاء (قامت وقفت وراه أخوها): “غرب مين يا طارق؟ ده بيت خالهم! أنت إيه اللي جابك هنا؟”
طارق (طلع ورقة من جيبه): “اللي جابني إن مراته عندها “دم” وكلمتني وقالتلي إنك رامية العيال هنا ورايحة تعيشي حياتك، وأنا معايا حكم رؤية ومعايا إثبات إنك مابقتيش أمينة عليهم!”
أحمد (اتدخل): “يا طارق اهدى، مفيش حاجة من دي حصلت، دي غيرة ستات، مراتي تعبانة وبتخرف.”
أنا هنا مقدرتش أسكت.. قومت وقفت رغم الوجع اللي بدأ يسمّع في ضهري.
أنا: “لا مش بخرف يا سيادة الأمين، الشنط أهي (شاورت على الشنط الكبيرة)، دي هدوم العيال كلها، وأمهم كانت ناوية تسيبهم وتروح شهر عسل، وجوزي كان موافق يربيهم هنا غصب عني وأنا حامل وفي شقة أوضتين.”
طارق (بص للشنط وضحك بسخرية): “تمام قوي.. صوّر يا عسكري الشنط دي في بيت خالهم.”
ياسين وجنا صحيوا على الزعيط.. طلعوا من الأوضة بيعيطوا، أول ما شافوا أبوهم جريوا عليه.
ياسين (وهو بيعيط): “بابا.. وحشتني قوي، أنا مش عايز أنام هنا، أنا عايز أروح بيتنا.”
جنا (ماسكة في رجل باباها): “بابا.. ماما قالتلي أنت مش عايزنا، وقالت إن عمو خالد هو اللي هيجيب لنا لعب.”
طارق خد العيال في حضنه، وبص لولاء بنظرة كسرتها: “بتقولي لهم أبوكم مش عايزكم؟ بتبعيهم عشان تروحي لواحد شارط عليكي ترميهم؟”
بص ليّ وقال: “متشكر يا مدام هنا.. أنتِ عملتي اللي “رجالة” كتير مقدروش يعملوه.”
خرج طارق والعيال والعساكر.. البيت فجأة بقى هادي، بس هدوء ما قبل العاصفة.
ولاء (بصت ليّ ومن بين سنانها): “حسبي الله ونعم الوكيل فيكي، خربتي بيتي، وخدتي عيالي مني، وشمتي طارق فيّ.. يا رب يحرق قلبك على اللي في بطنك.”
أنا مسمعتش باقي كلامها.. حسيت بـ “مغص” غريب، وسخونية بتجري في جسمي. أحمد قرب مني، بس مكنش خايف عليّ، كان عايز يضربني.
أحمد (رفع إيده): “أنتِ طالق يا هنا! طالق بالتلاتة! اطلعي بره بيتي، روحي لأهلك اللي معرفوش يربوكي على الأصول!”
أنا بصيت له بذهول.. الوجع زاد لدرجة إني وقعت على ركبي.
أنا (بألم): “أحمد.. الحقني.. أنا بنزف..”
أحمد (ببرود مرعب): “تمثيلك مش هياكل معايا، خدي شنطتك وأختي هتوصلك لحد الباب، مش عايز أشوف وشك هنا تاني.”
ولاء ضحكت بشماتة وجت شدتني من إيدي: “يلا يا حبيبتي، “بيتك” ده مابقاش بيتك، خليه يروح للي صانته.”
قمت وأنا ساندة على الحيطة، الوجع كان بياكل أحشائي، بس الكرامة كانت أقوى.. بصيت لأحمد اللي كان بيلف وشه الناحية التانية.
أنا: “ماشي يا أحمد.. بس افتكر اليوم ده كويس، عشان لما تيجي تبوس رجلي عشان أخليك تشوف ابنك، هفكرك إنك طردتني وأنا بموت عشان خاطر أختك اللي باعت عيالها.”
خرجت من الباب، السلم كان قدامي طويل قوي، والدنيا بدأت تسود في عيني.. وفجأة سمعت صوت ولاء بتصرخ من جوه الشقة صرخة رعب.
ولاء: “أحممممممد! إيه ده؟! الموبيل بتاعك.. الحق يا أحمد!!”
يا ترى ولاء شافت إيه في موبايل أحمد؟ وهل “هنا” هتلحق نفسها والجنين ولا دي النهاية؟
كل ده هنشوفه في الجزء الاخير من القصه
الجزء الاخير
أنا كنت خلاص، رجلي مش شيلاني، والوجع في بطني كأنه سكاكين بتقطع فيّ. نزلت أول درجة من السلم وسندت راسي على الحيطة، وفجأة سمعت صرخة “ولاء” جوه الشقة.. صرخة رعب حقيقي.
ولاء: “يا نهار أسود ومنيل! يا أحمد! إيه الرسايل دي؟ أنت كنت بتقبض تمن عيالي؟!”
أنا وقفت مكاني.. الوجع اتبخر ورا صدمة الكلام.
أحمد بصوت مهزوز: “هاتي الموبايل ده يا ولاء! أنتِ مش فاهمة حاجة.. ده عشان أصلح حالنا!”
ولاء (بصوت مخنوق بالدموع): “تصلح حالنا بـ 50 ألف جنيه؟ خالد خطيبي محولك 50 ألف جنيه عشان تقنعني أسيب العيال عندك “تأبيدة” وتوهموني إن ده حل مؤقت؟ أنت بعتني يا أخويا؟ بعت لحمك ودمك عشان القرشين؟”
الدنيا دارت بيّ.. أحمد “جوزي” اللي طردني وأنا بموت، كان بايع أخته وعيالها عشان يجدد عربيته!
أنا مكملتش سماع، السواد غطى عيني ووقعت.. ملقيتش نفسي غير في حضن “طارق” طليق ولاء اللي كان لسه في مدخل العمارة بيحط العيال في العربية.
طارق بخضة: “مدام هنا! يا ساتر يا رب.. يا عسكري هات مية بسرعة! الحقوني يا ناس!”
بعد ساعتين في المستشفى.. فتحت عيني، لقيت المحاليل في إيدي، وأمي قاعدة جنبي بتعيط، وطارق واقف بعيد وعيونه كلها قلق.
أنا (بصوت ضعيف): “ابني.. ابني جراله حاجة؟”
أمي (وهي بتبوس إيدي): “الحمد لله يا بنتي، الدكاترة لحقوكي.. نزيف من الزعل والضغط، بس لازم تفضلي تحت الملاحظة.”


