أنا “هنا”… في الشهر السابع، وبطني بدأت تتقل لدرجة إني بقيت بحس بنبض قلبي في رجلي من أقل مجهود. شقتي اللي كنت مهتمة بكل ركن فيها، اتحولت لساحة معركة.
أخت جوزي “ولاء” اتطلقت من سنة، ومن شهرين اتخطبت لواحد “مبسوط” ولقطة زي ما بيقولوا، ومن ساعتها وأنا حياتي اتقلبت.
الجرس رن الصبح بدري كالعادة.. فتحت وأنا مش قادرة أفتح عيني، لقيت “ولاء” قدامي، متشيكة وآخر أبهة، ووراها “ياسين” (6 سنين) و”جنا” (4 سنين).
ولاء: “صباح الفل يا هنونة! معلش بقى، العيال هيفطروا معاكي، ورايا كوافير وجولة في المول عشان الفستان.”
أنا بنهجان: “يا ولاء، أنا لسه منمتش، والضغط واطي عندي.. خليهم عند مامتك النهاردة.”
ولاء (وهي بتزق العيال لجوه): “ماما تعبانة يا هنا، وبعدين أنتِ قعدة قعدة، أهو تتمرني على العيال قبل ما تشرف (النونو).. يلا باي!”
نزلت ولاء، والباب اتقفل، وبدأت الحفلة..
ياسين: “طنط هنا.. أنا عايز أندومي!”
أنا: “يا حبيبي غلط الصبح، استنى هعملك بيض.”
جنا (بتعيط): “لأ.. عايزة شوكولاتة زي اللي كانت في التلاجة!”
دخلت المطبخ وأنا حاسة بدوخة، عملت الأكل وقعدت على الكرسي مش قادرة، لقيت ياسين داخل الأوضة عندي وبيجر “اللحاف” بتاع السرير على الأرض.
أنا بصوت مكتوم: “بتعمل إيه يا ياسين؟ كدا غلط يا حبيبي.”
ياسين ببراءة: “ماما قالتلي عود نفسك تنام هنا عشان دي هتبقى أوضتنا أنا وجنا.”
وقفت مكاني.. الدوخة راحت وحل مكانها رعب.
أنا: “أوضتكم فين يا حبيبي؟ أنت قصدك لما تيجي زيارة؟”
ياسين وهو بياكل: “لأ.. ماما قالت إن (عمو خالد) اللي هتتجوزه مش بيحب دوشة العيال، وإننا هنقعد مع خالو “أحمد” هنا علطول، وهتجيبلنا سرير دورين مكان الكنبة اللي جوه.”
جسمي كله اتنفض.. “أحمد” جوزي؟ معقول يكون عارف ومخبي عليا؟
فضلت طول اليوم أعصابي محروقة، العيال بهدلوا الصالة، وجنا دلقت العصير على السجادة الجديدة، وأنا مش هنا.. أنا مستنية أحمد يرجع.
الساعة 10 بالليل.. الباب اتفتح ودخل أحمد.
أحمد: “إيه يا حبيبي، العيال نايمين؟”
أنا ببرود مرعب: “أحمد.. هي ولاء ناوية تسيب عيالها هنا بعد الجواز؟”
أحمد ارتبك، فك الكرافتة وبص في الأرض: “يعني.. ظروف يا هنا، الراجل شارط إن العيال ميبقوش معاه في الأول، وولاء عايزة تستر نفسها.. هيروحوا فين يعني؟”
أنا بصوت عالي: “يروحوا فين؟! ليهم أب، وليهم جدة! أنا حامل يا أحمد، وتعبانة، وشقتي أوضتين وصالة.. هعيش فين أنا وابنك اللي جاي؟”
أحمد: “هنا.. وطّي صوتك، دول ولاد أختي، يعني زي ولادي.. وبعدين ولاء هتدفع مصاريفهم، يعني مش هيخسرونا حاجة.”
الكلمة دي نزلت عليا زي السكينة.. “مش هيخسرونا حاجة”؟ هو فاكر إن الموضوع أكل وشرب بس؟
أنا: “يعني أنت موافق؟ موافق إن بيتي يبقى “بيت بديل” عشان أختك تتجوز وتعيش حياتها وأنا اللي أشيل الشيلة؟”
أحمد: “ده اللي عندي يا هنا، ولاء أختي ماليش غيرها، والعيال هيفضلوا هنا.. خلصنا.”
دخل الأوضة ورزع الباب.. سبته وقعدت في الصالة وسط لعب العيال المرمية، ودموعي نازلة مش بتوقف. وفجأة.. الجرس رن.
فتحت، لقيت ولاء، بس المرة دي معاها “شنطتين سفر” كبار.
ولاء بابتسامة صفراء: “معلش يا هنا، جبت هدوم العيال كلها، أصل خالد خطيبي قدم المعاد والكتب الكتاب بكرة، وهسافر معاه (شهر عسل) شهر كامل.. خلي بالك منهم بقى.”
أنا بصيت للشنط، وبعدين بصيت لولاء، وضحكت ضحكة غريبة خلت ولاء تخاف وترجع لورا.
أنا: “ألف مبروك يا عروسة.. بس الشنط دي مش هتدخل هنا.”
ولاء: “أنتِ بتقولي إيه؟ أحمد قالي إنك موافقة!”
أنا: “أحمد يوافق في بيته اللي هيسكن فيه لوحده.. لكن هنا؟”
طلعت الموبايل وطلبت رقم.. رقم “طارق” طليق ولاء اللي الكل كان بيقول عليه ظالم.
أنا: “أيوة يا أستاذ طارق؟ أنا هنا مرات أخو طليقتك.. عيالك عندي، وأمهم هتتجوز بكرة وسايباهم، تيجي تاخدهم دلوقتي حالا بالجهات لو عايز، وإلا هكلم النجدة أبلغ إن في عيال متسابين عندي وأنا معرفش عنهم حاجة.”
أحمد طلع من الأوضة مذهول: “أنتِ اتجننتي يا هنا؟! بتكلمي طليقها؟”
أنا بصيتله بكل قوة: “أنا مابقتش “هنا” الطيبة اللي بتسكت.. البيوت ليها حرمة، وأنا مش خدامة عند أختك.. العيال دي هتخرج من هنا دلوقت، يا إما أنا اللي هخرج ومش هتشوف وشي ولا وش ابنك تاني.”
في اللحظة دي.. تليفون ولاء رن.. كان “خالد” خطيبها.
ولاء ردت وهي بتترعش: “أيوة يا خالد.. إيه؟ طارق كلمك؟.. يا خالد اسمعني..!”
وش ولاء جاب ألوان، وبصتلي بغل وقالت: “خربتي بيتي يا هنا.. خالد فسخ الخطوبة وقال مش عايز عيلة مشاكل!”
أنا ببرود: “أنا مخربتش بيتك.. أنا حميت بيتي أنا.. والشنط دي تاخديها وأنتِ نازلة، عشان طارق زمانه على السلم.”
#الكاتبه_نور_محمد
أحمد كان واقف في نص الصالة، عروق رقبته بارزة لدرجة إني خوفت تطق، بص لولاء اللي كانت واقعة على الأرض بتعيط بهيستيريا بعد ما خطيبها قفل السكة في وشها، وبعدين لف ليّ وهو بيجز على سنانه.
أحمد: “أنتِ عملتي إيه؟! أنتِ دمرتي حياة أختي! أنتِ فاهمة يعني إيه تطلبي طارق وتبلغيه؟!”
أنا ببرود: “أنا حميت ابني اللي في بطني يا أحمد، أختك كانت بتخطط تسيب عيالها هنا “تأبيدة” مش أسبوع ولا شهر.”
أحمد (زعق بصوت هز الحيطة): “وتقومي تخربي جوازتها؟! ده أنا كنت هخلص من همّهم! أنتِ مريضة؟ أنتِ غيرانة منها عشان هتتجوز واحد غني؟”
