مرت سنة كاملة على اليوم ده، بس الوجع لسه مسمع في عضمي.. مش وجع الجسد، لا، وجع القلب اللي مبيلمش.
كنت لسه والدة “سليم” بقالي أسبوع واحد، النهاردة 17 رمضان.. يعني المفروض أكون في قمة فرحتي بضنايا اللي جه بعد شوق، لكن اللي حصل كان العكس تمامًا.
قاعدة في أوضتي، لافة بطني ومسكنات الدنيا في جسمي عشان أقدر بس أصلب طولي وأرضع الولد.
دخلت عليا حماتي، من غير ما تخبط حتى، ووشها مبيتفسرش. قعدت على طرف السرير وقالت بنبرة آمرة:
“بقولك إيه يا منى، بكرة الجمعة والبيت كله هيتجمع هنا.. إنتي عارفة إن دي عاداتنا، وميصحش رمضان يعدي من غير لمة العيلة.”
بصيت لها بذهول وقلت بصوت واطي:
“تنوروا يا ماما طبعًا.. بس حضرتك عارفة إني لسه تعبانة، وموضع العملية لسه مشدود عليا جداً.”
لوت بوزها وقالت ببرود:
“يا حبيبتي الستات زمان كانت بتولد من هنا وتقوم تحصد الغيط من هنا.. بطلي دلع ماسخ، وبعدين أنا قولت لـ (محمود) إنك إيديكِ في الأكل مفيش زيها، وهو وافق إنك تعملي الأصناف الصعبة.”
قلبي دق بسرعة من الصدمة، وسألتها:
“محمود وافق؟! وافق إني أقف في المطبخ 6 ساعات وأنا لسه بحالتي؟!”
ردت وهي قايمة وماشية ناحية الباب:
“أيوة وافق.. جهزي نفسك بكرة الصبح، اللحمة والخضار هيجوا بدري.. مش عايزين كلام قدام خالاته.”
خرجت وسابتني في دوامة..
استنيت محمود لما رجع من الشغل، دخل الأوضة رمالي الكيس اللي في إيده وقالي:
“جبتلك المسكن اللي طلبتيه.. شدي حيلك بقى عشان بكرة.”
بصيت له ودموعي نزلت غصب عني:
“يا محمود اتقي الله فيا.. أنا لسه والدة قيصري، الدكتورة قالت حركة خفيفة، مش وقفة قدام بوتاجاز وحر وصيام!”
قعد قدامي على السرير وقال بنبرة خالية من أي رحمة:
“يعني أكسر كلمة أمي؟ عايزاني أقولهم مراتي مش قادرة تطبخ؟ هيقولوا عليا إيه؟ وبعدين ما إنتي قاعدة طول النهار، والواد نايم.. اعملي الأكل على مهلك.”
صرخت بقهر:
“على مهلي إزاي؟! دي عزومة لـ 20 بني آدم! محاشي وصواني وحلويات.. إنت حاسس بيا أصلاً؟”
وقف واداني ضهره وقال وهو خارج:
“خلاص يا منى، الموضوع انتهى.. مش عايز نكد، وبكرة الأكل يكون جاهز قبل المغرب.”
جه يوم العزومة.. الساعة 10 الصبح.
كنت واقفة في المطبخ، حاسة إن روحي بتطلع مع كل وطة بوطيها عشان أجيب حلة أو أغسل خضار. سليم بدأ يعيط.. عياط هستيري.
سيبت أداة المطبخ من إيدي ورحت أشيله، لقيت حماتي داخلة المطبخ ووراها سلفاتي. بصتلي بقرف وقالت:
“إيه ده؟! إنتي سايبة المحشي ورايحة تشيلي الواد؟ ما تسيبيه يتعب شوية، المهم الأكل يخلص!”
قلت لها وأنا بانهج:
“يا ماما الواد جعان، محتاج يرضع ويغير.. وأنا والله ما قادرة أقف على رجلي.”
ردت واحدة من سلفاتي بضحكة صفرا:
“معلش يا منى، كلنا ولدنا وعملنا كدة.. ولا إنتي بس اللي فرفورة؟”
حماتي كملت:
“سيبي الواد لـ محمود يسكته، وخلصي المحشي ده.. مش فاضل غير 5 ساعات على المغرب.”
الساعة بقت 5.. المطبخ كان عبارة عن فرن. العرق نازل مني بغزارة، وعيني بدأت تغيم.
موضع العملية بدأ يوجعني وجع غريب، كأن فيه ألم بيروح ويجي جواه. خرجت الصالة لقيتهم كلهم قاعدين بيضحكوا وبيهزروا، ومحمود قاعد بيلعب في الموبايل وسليم بيصرخ جنبه ولا هو هنا.
قلت بصوت مرعوش:
“يا محمود.. حد يساعدني.. أنا دايخة.”
حماتي ردت وهي بتعدل قعدتها:
“خلصي يا منى، الفتة لسه متحطتش في السرفيس.. بلاش تمثيل بقى، إحنا جعانين.”
رجعت المطبخ وأنا بجر رجلي جر.. مسكت صينية الرز الكبيرة عشان أطلعها.. وفجأة..
حسيت بسخونية رهيبة نزلت على رجلي.. بصيت تحت لقيت هدومي غرقانة في أثر الحالة.. موضع العملية اتفتح..
محستش بحاجة بعدها غير وصوت الصينية وهي بتتهبد على الأرض وبتتكسر 100 حتة..
وآخر حاجة سمعتها كانت حماتي بتزعق:
“يا لهوي! الرز اتدلق! العزومة باظت يا منى!”
أما محمود.. فكان واقف بيتفرج عليا وأنا في حالة صحية حرجة، وكأنه شايف حد غريب مش مراته وأم ابنه.
#الکاتبه_نور_محمد
تكملة القصة.. الجزء الأخير
فتحت عيني بصعوبة.. ريحة بنج ومطهرات، وجسمي متوصل بخرطوم محاليل. أول ما فوقت، كان وش أمي قدامي، عينيها منفخة من العياط.
قلت بصوت مش طالع:
— “سليم فين يا ماما؟ والحالة اللي كانت على الأرض؟”
أمي مسحت دموعها وقالت بقهر:
— “سليم معايا يا بنتي، وأخوكي هو اللي جابك المستشفى.. موضع العملية اتفتح وحالتك الصحية بقت حرجة، والدكتور قال لو كنتِ اتأخرتي نص ساعة كمان كان جالك تدهور خطير.”
في اللحظة دي، الباب اتفتح ودخل محمود.. وراه أمه.
كنت فاكرة إنه داخل يعتذر، يطمن، يمسك إيدي.. بس الصدمة كانت في أول كلمة قالها:
— “حمد لله على السلامة.. شوفتي بقى؟ بوظتي العزومة وكسرتي الصواني، والناس مشيت من غير ما تاكل لقمة!”
بصيت له بذهول.. الدموع جمدت في عيني.
حماتي كملت وهي بتعدل طرحتها ببرود:
— “والله يا بنتي إحنا اتكسفنا قدام العيلة.. كان لازم تشدي حيلك شوية، الستات الجدعة بتبان في المواقف دي.”
أمي وقفت زي الأسد وقالتلهم:
— “ستات إيه وجدعة إيه؟! دي كانت حالتها خطرة! إنتو معندكوش رحمة؟!”
محمود رد بزعيق:
— “يا طنط دي ولادة مش عملية قلب مفتوح! وبعدين أنا دفعت تعب قلبي في المستشفى دي دلوقتي.. مين هيعوضني؟”
في اللحظة دي، “منى” اللي كانت بتخاف وبتسكت ماتت.. واتولدت واحدة تانية خالص.
سندت ضهري على السرير رغم الألم، وقلت بهدوء مرعب:
— “خلصتوا؟”
محمود بص لي باستغراب:
— “إيه الهدوء ده؟”
قلت له:
— “يا محمود، العزومة فعلاً باظت.. بس مش اللي باظت في البيت، دي اللي باظت في قلبي. إنت طلقتني يا محمود.”
الأوضة سكتت تماماً..
حماتي ضحكت باستهزاء:
— “تطلقي عشان عزومة؟ إنتي اتجننتي يا بت؟”
