قصه قصيره

بابا انا شفتك خارج من اوضة ماما بقلم الكاتب اسماعيل موسى

الشيخ ودعنا ومشى، قعدت مع مراتى وبنتى فرحان بالفرج اللي حل علينا بعد أيام من الخوف والتعاسه. مراتى حضرت الأكل واتغدينا، وشربت قهوتى ودخنت سيجاره لأول مره بمزاج معتدل. مراتى حنان كانت قليلة الكلام، بترد على قد السؤال، عذرتها، كنت عارف إن اللي مرينا بيه مش سهل. وأنا قاعد بدخن خرجت التليفون بتاعى بعد ما كنت نسيته، أشوف الرقم الرخم اللي كان عمال يرن عليه، ملقتش أى رقم متصل وارد، آخر اتصال كان من تليفونى أنا على الشيخ بقله إنى هنتطره جنب أسوار المشفى.

معقول دا ممكن يحصل؟ مراتى شافتنى قاعد شارد بفكر، سألتني فيه إيه، قلتلها: فاكره التليفون اللي كان عمال يرن؟ لسه ببص فيه ملقتش أى مكالمه وارده. مراتى قالت بلامبلاه: تلاقيه المنبه، وسابتنى ومشيت. ابتسمت رغم عنى، هو أنا مش هعرف الفرق بين المنبه والاتصال؟ لكن لما فتشت فى التليفون لقيت فعلا أنا ضابط المنبه على التوقيت ده ١٢٣٠. ياه يا بدر، دا انت دماغك هيست خالص، أكيد لما ضغطت على الزراير فى جيبى المنبه فصل.

وحسيت إن دماغى مصدعه وجسمى مش على بعضه، فقمت أريح شويه. روحت على غرفة نومنا أريح شويه. حنان كانت بتلعب مع بنتنا. لما شافتنى داخل الاوضه قالت: رايح فين؟ قلت: داخل اوضتنا أريح، حاسس نفسى تعبان شويه!! حنان رفعت وشها بابتسامه: لا يا أستاذ، روح نام فى اوضتك، احنا لسه متصالحناش. ضحكت لانى كنت عارف إنها بتهزر. بس قبل ما أوصل الباب حنان قالت بنبره جديه: بدر، روح على اوضتك. راما توقفت عن اللعب ووشها خاف. وقفت لحظه أفكر.

بعدها قلت: احنا لسه طالعين من مشكله كبيره ومش لازم اتعصب واعمل مشكله تانيه. اسماعيل موسى. أول ما مشيت على غرفتى راما رجعت تلعب تانى، ودا كان كافى بالنسبه ليا إن راما تكون سعيده. دخلت غرفتى وحسيت بأرهاق شديد جدًا، نمت على طول، نايم مش حاسس بحاجه. رغم كده تخيلت إنى شايف راما واقفه جنب السرير بتبص عليه، عنيها مبرقه وملامحها ثابته، فضلت وقت طويل واقفه، بعدها مشيت. فتحت عنيه من النوم وحاولت أقوم من على السرير لقيت نفسى لسه تعبان.

ولما بصيت على الشباك نور النهار كان لسه بره، قلت يمكن ما اخدتش حقك من النوم، نام تانى. راما دخلت الغرفه: مش كفايه نوم كده يا بابا؟ قلتلها: لسه حاسس نفسى تعبان، وبعدين يا حبيبتى أنا منمتش غير يدوبك ساعه أو اتنين. راما فتحت بقها: بابا انت نمت أكتر من عشرين ساعه. قلت بصدمه: بتقولى إيه؟ قالت راما: يا بابا، الليل وصل ومشى وانت لسه نايم. بصيت فى التاريخ لقيت نفسى نمت فعلا يوم كامل، نمت أمس وصحيت النهارده. وانا فى الصدمه دى حنان ظهرت.

وقالت راما بصوت صارم: روحى على اوضتك يا راما ومتدخليش هنا تانى من غير أذنى. راما قالت بطاعه: حاضر يا ياماما. قلت بعصبيه: يا حنان، ليه بتكلمى راما بالطريقة دى؟ إيه المشكلة إنها تدخل غرفتى وتتكلم معايا؟ حنان غيرت نبرتها، تخلت عن عبوس وجهها وقربت منى: بدر حبيبى، انت تعبان ويمكن مريض، نمت امبارح وصحيت النهارده، ودا محصلش طول عمرنا. أنا خايفه تكون مريض والمرض ينتقل لبنتى حبيبتى راما. وضعت حنان ايدها فوق جبهتى وهمست: ياه انت سخن جدًا، صدقتى كلامى دلوقتى. تحركت حنان، احضرت تريمومتر قياس حرارة ورفعت ذراعى ثم ضغطت على ذراعى بعد أن ثبتت مقياس الحراره تحت إبطى. اسماعيل موسى، حرارتك ٤٠ درجه يا بدر، جسمك بيغلى، كنت متأكده انك مريض. حطيت ايدى فوق جبهتى لسعتنى الحرارة فعلًا، أنا لازم أروح لدكتور حالًا.

همست حنان: طبعًا يا حبيبى، لازم تروح لدكتور. حاولت أقف مقدرتش، لقيت جسمى كله بيترنح وركبى مش قادره تشيلنى، وقعت على السرير وأنا منهار. مش قادر يا حنان، مش قادر، مش عارف إيه اللي حصلى. همست حنان: سلامتك يا حبيبى. وقربت منى ضمتنى لحضنها، ثم دوى صوت تحطم داخل الشقه، شباك الغرفة خبط فى الجدار بقوه خلتها كان هيتحطم. حنان بعدت عنى مرعوبه وقربت من الشباك، وقفت دقيقه ضهرها ليا وقالت: دا حتى مفيش ريح بره.

بعد أن استدارات حنان وبصت على وشى قالت: أنا هطلب الدكتور يحضر هنا طالما انت مش قادر تتحرك. قلت: ياريت يا حنان، يا ريت، دماغى هتنفجر من الصداع. بعد الشر عنك يا بدر، حاضر هكلمه دلوقتى من تليفونك. اه أنا اخدت تليفونك فى غرفتى، راما بتحب تلعب بيه. قلت: أنا فى إيه ولا فى إيه دلوقتى يا حنان؟ اطلبى الدكتور من فضلك. خرجت حنان من الغرفه وسمعت صوتها فى الصاله بتكلم الدكتور، وأنا عمال أفكر إيه اللي حصلى، بس أنا كنت كويس.

حاولت أقف تانى، استندت على الجدار اللي كان بارد جدًا، مشيت لحد ما وصلت الشباك وأنا بلهث جدًا. بصيت على الشباك على الشارع اللي مكنش فيه نسمة هواء بره الغرفه. لما مديت ايدى كانت الدنيا حر، عكس غرفتى البارده جدًا. كنت عارف إن ده بسبب حرارتى المرتفعة. فى الشارع تحت بنايتنا لاحظت وجود متسول نايم على الرصيف، راجل مسكين كنت اعرفه من زمان وكنت بعطف عليه واديه بعض النقود لما تكون متوفرة معايا. الراجل رفع دماغه ولما شافنى واقف لوحلى بأيده.

بعدها شاور على المسجد اللي قصاد عمارتنا، بعدها بلحظه سمعت العصر بيأذن فى المسجد. بتعمل إيه؟ سمعت صوت حنان خلف ضهرى: انا مريض وتعبان، ارتاح، مدد على السرير يا بدر. القصه بقلم اسماعيل موسى. سحبتنى حنان نيمتنى على السرير ورفعت الغطاء فوق جسمى، مشت حنان ناحيت الشباك بصت على الشارع لدقيقة وقفلت الشباك. الدكتور هيوصل حالًا، هخرج ألم الكراكيب اللي عملتها بنتى راما، مش لازم الدكتور يشوف الشقه متبهدلة. قلت: طبعًا. روحت أولع سيجاره، ايديا اترعشت ومقدرتش، صعبت عليه نفسى وقعدت على السرير بحزن، جسمى منكمش وبيرتجف.

ظهرت راما قدام باب غرفتى، وقفت من غير ما تدخل، فضلت تبص عليه بنظره ثابته أكتر من دقيقه بطريقه غريبة. همست بضعف: مالك يا حبيتى؟ تعالى هنا، ادخلى، خلينى أحضنك!! راما مردتش على كلامى، سابت مكانها واختفت. الدكتور وصل، قاس الحراره وأجرى الكشف عليه: حرارتك مرتفعه، ضغطك واطى، عندك ضعف شامل ومحتاج راحه فى السرير. هكتبلك حاجه للسخونه والصداع، ومخلوط زوجتك هتعمله، لازم تتناولو بأستمرار عشان قوتك ترجعلك. الف سلامه يا أستاذ بدر، لو حسيت بأى حاجه تليفونى مفتوح اربعه وعشرين ساعة.

خرج الدكتور من غرفتى ووقف فى الصاله يتكلم مع مراتى بصوت خافت، وكان بيشاور عليه، وحنان كانت بتبص عليه كمان، بعدها اخد شنطته وغادر الشقه. مراتى وقفت على باب غرفتى: أنا هخرج أشترى الدواء يا بدر، من فضلك خليك فى السرير واتغطى كويس زى ما الدكتور ما نصحك، مش هتأخر.

مر أكتر من ربع ساعة على خروج حنان من الشقه، قضتها بفكر بيأس، مش معقول دور حرارة يعمل فيا كل ده، أول ما حالتى تتحسن وأقدر أتحرك هنزل على المشفى أعمل فحص شامل. فجأه راما ظهرت على باب الغرفه، نفس الوقفه ونفس النظره الثابته، لكن فى إيدها كان فيه حاجه. لما ركزت فيها لقيتها تليفونى. ابتسمت: متخفيش يا راما، العبى بالتليفون بتاعى، مش هزعق فيكى ولا أصرخ، أنا بس زعلان منك إن بابا تعبان ومريض وانتى مفكرتيش تيجى تبصى عليه أو تاخدنينى فى حضنك يا روح بابا. متعرفيش انى بحتاج حضنك؟ حضنك ممكن يشفينى من غير ما اخد علاج. ملامح وش راما اتغيرت، حسيت إنها هتبكى، رفعت التليفون فى إيدها: بابا انت لازم تاخد تليفونك، تليفونك لازم يفضل معاك، أنا مش عايزه العب بالتليفون، راما معاها لعب كتير، بس خلى دا سر بنا ماشى. قلت: حاضر يا حبيبتى، حاضر، هاتى التليفون. راما انتى بتعملى إيه؟ رن صوت مراتى حنان اللي وصلت الشقه حالًا. راما تراجعت لورا بعد ما كانت هتدخل عندى.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى