
وقفت بتبص على والدتها حنان، وحنان بتبص عليها، بعدها راما ضربت رجليها فى الأرض وجريت على غرفتها. ميصحص كده يا حنان، انتى بتعاملى راما بقسوة شديده. قالت حنان وهى بتدخل غرفتى: انت سمعت الدكتور قال إيه؟ قال إن حالتك صعبه وممكن تكون معديه، وانت مش عايز بنتى راما تصاب بالمرض هى كمان، راما دماغها صاعبه ومش هتبطل تحاول تدخل عندك، من فضلك لو كنت بتحبنى، لو بتحب بنتنا راما، لو حاولت تدخل عندك امنعها عشان مصلحتها.
اوعدتى يا بدر؟ أنا خايفه راما تمرض ولا أنت عايزها تموت؟ همست: مش للدرجه دى يا حنان، دا مجرد شوية حراره، لكن متخفيش، مش هسمح لراما تدخل عندى غير لما ابقى كويس. خد العلاج يا بدر، وناولتنى حنان كأس مياه، بلعت البراشيم وريحت على السرير، وبعد شويه حنان دخلت معاها طبق فيه شربة، قربته من بقى وطلبت منى أخلصه، وفضلت واقفه جنبى لحد ما شريته كله. نام يا بدر، بكره هتبقى كويس وكل حاجه ترجع لمجاريها.
النوم سرى فى عروقى وجسمى، جفونى قفلت على بعضها، اختفى صوت حنان وأنا بنام. نمت أربعة وعشرين ساعه، فتحت عنيه فى نفس الموعد. علقت كده لما حنان دخلت غرفتى وقالت إن دا طبيعى، وصحى لأن جسمى تعبان ومحتاج راحه، ودا معناه إن العلاج جاب مفعوله. كنت مبسوط من كلامها، لكن جسمى بيقول غير كده، جسمى بيخونى ومش قادر أمشى أو أتحرك. اشرب يا بدر، الخليط ده هيخليك كويس، دى أعشاب طبيعيه واصفه الدكتور ليك. همست حنان: ممكن تفتحى الشباك؟ حاسس نفسى فى سجن. شباك لا يا بدر، الشباك مش هينفتح، الأفضل الغرفه تفضل مغلقه، فى الخارج الهواء ملوث ودوشه وصداع. متقلقش يا حبيبى، هتبقى كويس قريب جدًا جدًا بطريقه آليه. حنان قربت منى تحضنى وفى آخر لحظه وقفت وبعدت وخرجت من الغرفه. مزعلتش منها، مكنتش عايز هى كمان تصاب بالمرض ويبقى مفيش حد ياخد باله من راما.
الغرفه بتاعتى بارده جدًا، والنهارده لما فتحت عيونى من النوم شميت ريحه وحشه، ريحة سمك معفن. كنت سامع حنان شغاله فى المطبخ بتغسل الأطباق وتطبخ الطعام، لكن راما مظهرتش. فين راما؟ راما من عادتها مش بتبطل تلعب فى الشقه وتعمل صداع، البنت العفريتة دى بتونسنى بدوشتها. فين راما؟ صرخت بأقصى صوت قدرت أطلعه، قعدت أصرخ لحد ما حنان سمعتنى من المطبخ، ردت عليه: راما فى غرفتها معاقبه. كملت حنان بنبره حسيتها حزينه أو مكسوره: أنا عاقبتها لأنها مش بتسمع الكلام. صوت طرقات على باب الشقه سمعتها وأنا مستغرب، احنا معندناش جيران فى العماره، وأنا مقطوع من شجره وأهل حنان فى محافظه بعيده عننا، يا ترى مين هيخبط على باب شقتنا؟
حنان فتحت الباب وكانت بتتكلم مع شخص بلهجه عنيفه وصوت عالى، وفى نفس اللحظه راما ظهرت على باب غرفتى وقالت: بابا أنا شفتك امبارح الليل كله فى غرفة ماما، وجريت على غرفتها بسرعه. بتتكلمى مع مين يا حنان؟ مع الراجل المتشرد اللي راقد تحت العماره؟ يا سيدى مش مكفيه التسول فى الشارع من الناس فى الرايحة واللي جاية، وصلت بيه إنه يخبط على باب بيتنا! وكان عايز إيه يا حنان؟
عايز رغيف عيش، باين هو أنا فاكره؟ مش المهم كان عايز إيه، الأهم إن الوقاحه وصلت بيه يخبط على الشقة ويسأل عليك كأنك قريبة مثلًا، غير لما قولتله إنك مريض ومش قادر تقوم من السرير. أعرف هذا الرجل وأعرف إنه يترفع عن تسول الناس فى الشارع، لا يمد يده طلب للحاجه ولا يقبل إلا كل ما قدم له بطيب نفس. غريبه، قلت وأنا بتكلم مع نفسى، دا عمره ما عمل كده، أكيد واقع فى أزمة كبيره. طيب كنتى اسألينى الأول قبل ما تتصرفى من دماغك.
مشيت حنان بسرعه ووقفت على الباب: هو أنا ممنوع أتصرف يعنى؟ امرأه مسلوبة الاراده؟ هو انت كنت هتعمل إيه مختلف عن اللي أنا عملته؟ تأففت فى سخط، مستحيل تقدر تفهم دماغ الستات بتفكر ازاى. قمت من على السرير وفتحت الشباك، اخدت أكتر من دقيقه لحد ما وصلت هناك، وفى كل خطوه كنت حاسس بآبرة بتتغرس فى عضمى. بصيت على الشارع، الراجل كان نايم فى مكانه، لما سمع صوت الشباك رفع دماغه وابتسم ورفع ايده ناحيت السماء وهمس بكلمة توقعتها: يارب، ورجع نام تانى فى مكانه.
ايه ده؟ اندفعت حنان نحوى: اقفل الشباك الزفت ده. بقوة صفعت حنان الشباك ووضعتنى خلف ظهرها: الشباك دا بالذات لازم يفضل مغلق، بيملى الشقه تراب وعفره، وأنا مش هفضل اليوم كله أنضف فى الشقه. وقفت فى وش حنان ببصلها بغضب. بابا هو انت ليه مش بتصلى زى زمان؟ وصل صوت راما إلى وقفت قدام الباب فى نفس اللحظه. صرخت حنان: راما، امشى، ادخلى غرفتك ومتخرجيش غير لما اسمحلك. استندت على الجدار البارد: هو فيه إيه يا حنان بالضبط؟




