تعمل كده. ولسه بنبص لبعض أنا وحنان وعنينا على أوضة راما، باب غرفة نوم حنان خبط جامد زي ما يكون شخص خارج منه. مراتي حنان لزقت في ضهري من الخوف: بسم الله الرحمن الرحيم، هو فيه إيه بيحصل يا بدر؟ يكونش زلزال؟ همست بصوت مخلوع: زلزال إيه يا حنان؟ مفيش زلزال كنا حسينا بيه. همست حنان: أنا خايفة يا بدر. أنا كمان كنت خايف لكن حاولت أكون ثابت. بدر، بدر، هي الشقة مسكونة؟
قلت: اسكتي، اسكتي، مش عايز أسمع صوتك خالص. في اللحظة دي وأنا وحنان واقفين متسمرين في المطبخ، باب الحمام اتفتح، ولما بصينا على الحمام شفت أنا وحنان أغرب حاجة في حياتنا كلها. بعينين مبرقة شفت نفسي داخل الحمام، رغم إني في نفس اللحظة واقف مع حنان مراتي في المطبخ. همست برعب: حنان، انتي شايفة اللي أنا شايفه ولا أنا بتخيل حاجات مش بتحصل فعلًا؟ مراتي حنان مسكت في دراعي بيد مرتعشة: شايفة يا أخويا، شايفة. حنان مقدرتش تستحمل أكتر من كده.
وقعت من طولها فقدت الوعي. كنت في حالة هذيان، عنيه مفتوحة ومش قادر أتحرك أو حتى أصرخ أو أنقذ حنان. عنيه مفتوحة بتابع اللي بيحصل كأني بتفرج على فيلم في السيما. الدش اشتغل في الحمام، بنتي راما اللي مكنتش نامت خرجت من غرفتها اللي في وش الحمام، باب الحمام مفتوح، لما بصت شافتني بستحمى تحت الدش، ولما فتحت عنيها أكتر وبصت شافتني واقف في المطبخ وتحت رجليه أمها واقعه على الأرض كأنها ميتة. راما شهقت ووقعت على الأرض من قبل حتى ما تلحق تصرخ.
بسحب في صوتي كأنه جاي من مكان بعيد قوي، أخيرًا صوتي طلعت وصرخت. صرخت كتير أكتر مما اتخيل، مكنتش قادر أوقف. العمارة اللي ساكنين فيها مفيهاش سكان غيرنا، يعني حتى النجدة مش هتوصلنا. مع صراخي صوت المية توقف، والحمام بقى فاضي، اختفى منه شبيهي اللي كان فيه. جريت على التليفزيون أشغل القرآن، كل ده وبنتى ومراتى مرمين على الأرض فاقدين الوعي. حطيت الفيشة ويدوبك بضغط على زر الريموت، الفيشة ولعت، والمصابيح بتاعت الكهربا اللي في الشقة كلها قعدت ترتعش تومض وتبطل بطريقه مرعبه. القصة بقلم اسماعيل موسى.
وبعد لحظه كل المصابيح انفجرت ووقعت على الأرض، الدنيا بقت ضلمه كحل، أسناني عماله تصطك، جسمى كله بيرقص وعمال أقول يارب يارب. جريت على باب الشقة أفتح الباب، شديت الباب بكل قوتى، وافتكرت إنى قافل الشقة بالمفتاح، المفتاح اللي كان في غرفتى. رجليه بتخبط في بعضيها، كل حركه بتخيل إن الشخص ده هلاقيه قدامى أو هيظهر فجأه ويخنقنى، ورغم إن باب غرفتى مفتوح اترعبت أدخل الغرفه أدور على المفتاح. ايدى خبطت في جيبى وجت في التليفون، طلعت التليفون بسرعه وفتحت الفلاش.
صوبته على الحمام أول حاجه اللي كان فاضي، بعدها على راما بنتى حبيبتى اللي دخلت في تشنجات عنيفه وبقها ريل. مجرد رؤية بنتى بتموت حرك حاجه جوايه. جريت على غرفتى، المفتاح كان على الكومدينو، اخدته بسرعه وفتحت الباب ونور السلم دخل جوه الشقه. جريت على راما شلتها من على الأرض وحطتها قدام الشقه، وبعدها شلت حنان مراتى وممدتها جنبها. قومى يا حنان قومى، وعمال أخبط على وشها بايدى وأضربها بالقلم. حنان فتحت عنيها أخيرًا، شدتها تقف.
وهى مذهوله وشلت راما في حضنى وجريت حنان ورايا ونزلت جرى على الشارع. لما وصلنا الشارع بدأت أتمالك نفسى شويه، رؤية الناس والنور حسسنى بالأمان. وقفت تاكسى ومن غير كلام نزلت راما داخل التاكسى وشديت حنان جنبى: اطلع يا أسطى على المستشفى بعد إذنك، بنتى بتموت. سواق التاكسى بص لورا: مستشفى إيه يا أستاذ؟ أي مستشفى بسرعه وحياة أبوك. وصلنا المستشفى واخدوا راما على غرفة العنايه المركزه، وقعدت أنا وحنان في الانتظار. معداش كتير والدكاترة طمنونى على راما إنها كويسه، لكن حصلها صدمه نفسيه عنيقه هى سبب التشنجات. كل دا وحنان ساكته خالص.
حتى مفكرتش تسأل على بنتها راما، عنيها بدمع وصمت قاتل. قعدت اتكلم معاها: حنان يا حنان، فوقى يا حبيبتى. حنان عماله تبصلى وترجع تبص على جدار المستشفى من غير كلام. يا حنان، دا عفريت أو جنى، هجيب شيخ يطلعه وكل حاجه هتبقى كويسه! مراتى بصتلى بصه غريبه ورجعت تبص للفراغ من غير ولا كلمه. بنتنا تعبانه يا حنان، بنتنا محتاجاكى، من فضلك تمالكى نفسك عشان خاطر بنتنا! لا حياة لمن تنادى. بنتنا فاقت والممرضة قالت ممكن نشوفها. اخدت حنان معايا ودخلنا غرفة راما بعد ما خرجت من العنايه المركزه.
راما أول ما شافت والدتها همست بضعف: ماما حبيبتى أنا خايفه، ورمت نفسها والدتها. حنان اخدت راما فى حضنها وقعدت تطبطب عليها وعنيها عماله تبكى. أخيرًا حنان نطقت: انتى كويسه يا حبيبتى؟ أنا هنا، متخفيش، متخفيش. وبصتلى حنان بصه غريبه وكريهه: أنا جنبك يا روح قلبى، مش هسمح بحاجه تحصلك. طلعت بره فى الطرقه، ورغم إن الوقت متأخر كلمت أكتر من صديق أسأل عن شيخ كويس. مرضتش أقول الحقيقه، كنت بقولهم عايز شيخ عشان ناس جيرانا بنتهم ممسوسة. ادونى أكتر من اسم، فيهم واحد ساكن فى منطقه قريبه منا.
كلمته على طول وحكيت ليه اللي حصل. الراجل سمعنى كويس وقال: بسيطه متقلقش، احنا متعودين على الحجات دى. بكره إن شاء الله أجيلك ونطهر الشقه وأخرجلك المعلون دا منها. وقعد يقولى اسمع قرآن وصلى ومترجعش هناك غير لما أكون معاك. قضينا الليله فى المستشفى، حنان رفضت ترجع معايا الشقه، قالت مش هدخل الشقه دى تانى. والشيخ وصل فى ميعاده وكان مستنينى قدام المستشفى. خدنا تاكسى وروحنا على الشقه، الباب كان مفتوح زى ما سبته، لكن جوه الشقه المصابيح الكهربائيه رجعت مكانها، مكنش فيه ولا مصباح مكسور.
