بابا أنا شفتك خارج من أوضة ماما امبارح بالليل وماما كانت مبسوطة خالص، أنتو خلاص اتصالحتو؟ وقفت في مكاني مخضوض: راما حبيبتي انتي بتقولي إيه؟ بتقول يا بابا إني شفتك خارج من أوضة ماما امبارح بالليل، ولما دخلت أوضة ماما لقيتها مبسوطة وفرحانة، حتى بستني. بلعت ريقي بصعوبة، أنا بنام في غرفة الأطفال الفاضية بقالي أكتر من تلت شهور بعد ما اتخانقت مع مراتي، ولا عمري قربت من غرفتها ولا بكلمها أصلًا.
كان لازم أروح الشغل ومراتي لسه نايمة. بصي يا راما يا حبيبتي، خلي الموضوع دا سر بيني وبينك لحد لما أرجع من الشغل ونتكلم فيه، متقوليش لماما حاجة خالص. نزلت من البيت وأنا بفكر: الحمد لله إني عايش معاهم في نفس الشقة، وإلا زمان دماغي كانت راحت لبعيد. لما رجعت من الشغل لقيت مراتي محضرة الغداء وعلى سنجة عشرة، استقبلتني بابتسامة ويا حبيبي ومش عارف إيه، وأنا مستغرب جدًا، احنا لسه متصالحناش ولا حاجة، ومش من عوايد مراتي تنخ بسرعة.
قلتلها: فيه إيه يا حنان؟ اعتقد إننا لسه متخاصمين. ردت حنان بمزاح: ما انت جيت الأوضة عندي امبارح واتصالحنا. مقدرتش أمسك نفسي وصرخت: يا بنت الكلب، أوضة مين؟ أنا مدخلتش أوضتك ولا هوبت منك، مين الراجل اللي كان عندك؟ انطقي يا مرة! مسكت مراتي من شعرها وجرجرتها ورايا، بس لما بنتي قعدت تصرخ سبتها، ومراتي على لسانها حاجة واحدة: انت اتجننت يا بدر؟ ما انت اللي كنت في غرفتي مبارح. حاولت أهدى، مسكت نفسي وقلت: مدخلتش أوضتك امبارح ولا هوبت ناحيتك. راما قالت: والله كنت انت يا بابا، يعني أنا هتوه عنك مثلًا؟ ومراتي قعدت تحلف على المصحف إني أنا اللي كنت عندها، لحد ما شكيت في نفسي، هو أنا بمشى وأنا نايم ولا إيه؟ بس الصدمة الحقيقية كانت لما حنان مراتي قالت بعصبية وهي بتبكي: وبعدين دي مش أول مرة تدخل غرفتي في نص الليل وأنا ساكته عشان مش عايزة يحصل مشكلة. اتجننت؟ بقلك بقالي أكتر من تلت شهور لا دخلت غرفتك ولا لمستك.
تعرف زوجتي إني مستحيل أكذب، لذا همست في استكانة: والله هو دا اللي حصل. من عشرة أيام كده، كل ما الساعة تدق ١٢ بالليل بتخبط وتدخل عندي. قبلها لاحظت إنك بتيجي بالليل تقف قدام باب غرفتي لمدة طويلة، حتى أنا استغربت، لأنك بعدها بتمشى من غير ما تتكلم أو تخبط على الباب. يعني أنا كذاب يا حنان؟ ثم أنا ليه هكدب؟ هو انتي مش مراتي؟ اسماعيل موسى، كل واحد فينا أنا وحنان أخد جنب مع نفسه، وبنتي راما قعدت تعيط وتبكى. ولعت سيجارة وأنا بالعافية بحاول أملك غضبي بالعافية.
طيب أقوم أأذي الست دي ولا أعمل إيه؟ وبعدين هديت شوية وقعدت أفكر: لو مراتي بتخترع الأحداث دي، راما بنتي ليه تكدب؟ رفعت صوتي لكن بهدوء: راما حبيبتي تعالى هنا، أنا عايزك، هنخرج مع بعض أشتريلك حاجة حلوة. بنتي همست: أنا خايفة يا بابا، مش عايزة أخرج. هننزل السوبر ماركت اللي تحت العمارة ونرجع على طول، وبعدين هتخافي وانتي مع بابا؟ نزلت مع راما اشترينا شيكولاته وشيبسي وحاجة ساقعة. راما، انتي عارفة إن بابا بيحبك صح؟
صح يا بابا. طيب ينفع تكدبي على بابا؟ همست راما وهي بتفتح الشيكولاته: لكن أنا مش بكدب يا بابا. بصي يا راما يا حبيبتي، لو كانت ماما قالتلك تقولي الكلام اللي انتي قولتيه ليا، أنا مش هزعل ولا هزعل من ماما، بل انتي هتعملي حاجة جميلة أوي، هتحلي المشكلة بيني وبين ماما. مش انتي عايزانا نتصالح ونبقى كويسين؟ قالت راما: طبعًا يا بابا، ياريت. طيب يا حبيبتي قوليلي بقى، انتي اخترعتي الكلام ده صح؟ انتي مشفتنيش داخل غرفة ماما أو خارج منها.
رفعت راما وشها بخوف: لكن هو دا اللي حصل يا بابا، والله أنا شفتك خارج من غرفة ماما وأنا راجعه من الحمام، وكمان انت شاورتلي وبعتلي بوسة في الهوا. نهار أسود، همست في سري وأنا مصدوم، لحد دلوقتي كان عندي أمل تكون راما بنتي بتكدب. رجعت على الشقة وركبى بتخبط في بعضها. حنان مراتي كانت قاعدة في الصالة بتبكي. ضغطت على نفسي وقربت منها: متزعليش، همست وأنا بربت على كتفها. قالت مراتي: بقا بتكدبني بعد العمر دا كله يا بدر؟ دا أنا صبرت معاك سنين طويلة لحد ربنا ما أكرمنا ببنتنا راما.
قعدت جنب حنان مراتي وقلت بكل هدوء: انتي بتقولي كل ليلة الساعة ١٢ بالليل بدخل عندك صح؟ أيوه صح يا بدر. وأنا متأكد إني في الوقت ده بكون نايم زي الميت. حطيت صباعي على دقني وربنا ألهمني: بصي، الساعة ١٢ بالليل مش بعيدة، لو كنت بمشى وأنا نايم، لو كنت بعمل حاجات وأنا مغيب، لما ينتصف الليل هنشوف إيه اللي هيحصل. قعدت في الشرفة أدخن سجاير وأشرب قهوة وأبص في الشارع وأعصابي مش على بعضها. مراتي حنان عملت اللي قولتلها عليه. الساعة ١١ بالليل دخلت راما غرفتها عشان تنام رغم إن راما كانت رافضة تنام، بعدها دخلت غرفتها.
وأنا قبل الميعاد بنص ساعة دخلت غرفتي أشوف إيه اللي بيحصل معايا بالضبط. نمت على السرير وأنا عمال كل شويه أبص على الساعة اللي كانت ماشيه ببطيء شديد، بقت إلا تلت إلا عشرة، الساعة بقت ١٢ بالليل، لا اتحركت من سريري ولا مشيت روحت أوضة حنان مراتي وأنا مغيب ولا أي حاجة. قلت: يا ولد استنى كمان نص ساعة عشان تتأكد وميكنش فيه أي فرصة للشك.
النص ساعة خلصت، ولعت سيجارة بانشكاح وإحساس بالنصر بيتلوى داخل صدري وأنا خارج من غرفتي ناحيت غرفة مراتي. سعلت وخبطت بثقة على الباب قبل ما أفتحه، وعلى وشي ابتسامة عريضة إني هفحم مراتي ومش هتقدر تتكلم. أول ما حنان مراتي لمحتني ضحكت بخدود متوردة: هو انت لحقت ترجع؟ صرخت بانفعال: ارجع من فين يا ست انتي حنان؟ ضمت البطانية على جسمها بخوف وقالت: مش انت كنت هنا ولسه خارج من الغرفة حالًا من دقيقة؟ قربت من مراتي وعفاريت الدنيا كلها بتتنطط قدامي. مراتي بتستهبل؟ لأما اتجننت. أنا ممكن استحمل إنها تكون اتجننت فعلًا، لكن تكون بتمسخر بيا؟ أقسم بالله لأطلقها الليلة.
حنان كانت خايفة جدًا مني لدرجة إنها قالت برعب: انت هتضربني يا بدر؟ أنا مدخلتش غرفتك. يا حنان، كل حركة عملتها من الساعة ١١ بالليل متأكد منها جدًا. قربت أكتر وقعدت جنب حنان، ولاحظت إن المكان جنبها دافي زي ما يكون شخص كان نايم ولسه تارك مكانه حالًا. الشك لعب في صدري لدرجه بعيدة جدًا، لكني متأكد إني قفلت الشقة بالمفتاح. انتي كدابة يا حنان واللعبة بتاعتك خلصت، لو مقلتيش الحقيقة هطلقك حالًا دلوقتي. شهقت حنان بصدمة: تطلقني يا بدر!
نفس اللحظة اللي حنان صرخت فيها، حاجة وقعت في المطبخ عملت صوت جامد خلّتني أنا وحنان سكتنا خالص. قمت من مكاني مفزوع وجريت على المطبخ، كل الأطباق المرصوصة وقعت على الأرض واتكسرت، وحنان كانت واقفة ورايا. رف الأطباق بتاعنا عريض، مستحيل الأطباق تقع منه من نفسها، لازم يكون شخص وقعها بنفسه. أول حاجة جات في بالي راما بنتي، لكن بتفكير بسيط جدًا، الرف عالي مستحيل راما توصل ليه، ومفيش مقعد موجود جوه المطبخ راما تقدر تستخدمه وترجعه مكانه بالسرعة دي، مستحيل
