وحت لمكتب إيناس وأنا مش قادرة أبطل أفكر في كلامها ولما دخلت لقيتها حاطة قدامها ملف كبير وأول ما شافتني قفلت باب المكتب بالمفتاح
قالتلي اقعدي يا كلارا لأن اللي هتشوفيه دلوقتي لازم تتعاملي معاه بعقلك مش بقلبك
فتحت الملف وطلعت صور تحويلات بنكية بمبالغ كبيرة من حساب الشركة لحساب نادين
بصيت للأرقام وأنا مش مصدقة
خمسمية ألف جنيه وبعدها تلتمية ألف وبعدها تحويل بمليون ومتين ألف جنيه
سألتها بصوت بيرتعش
الفلوس دي راحت فين يا إيناس
ردت وهي بتقلب في الورق
المشكلة مش في الفلوس بس المشكلة إن كل التحويلات دي اتعملت بموافقة مكتوبة عليها إمضتك
مسكت الورقة وقربتها من عيني
الإمضا كانت شبه إمضتي فعلًا لكن فيه حاجة صغيرة مختلفة في آخر حرف
قلت لها بسرعة
دي مش إمضتي أنا عمري ما وافقت على تحويل جنيه واحد لنادين
إيناس هزت راسها وقالت
وده اللي خلاني أشك إن فيه تزوير لكن لازم نثبت إن ياسين هو اللي وراه قبل ما نواجهه
سكت شوية وبعدين سألتها
هو ممكن يكون بيسرق الشركة
قالتلي إن الحسابات بتشير إن فيه مبالغ اتسحبت على مدار شهور وإن جزء منها اتسجل على إنه مصاريف مشروعات وهمية
حسيت إن نفسي اتسحب مني
ياسين مش بس خانني ده ممكن يكون استخدم اسمي عشان يغطي على جري\مة مالية
قمت من مكاني وقلت لها
عايزة كل حاجة تتراجع من أول يوم دخل فيه الشركة لحد النهارده ومحدش يعرف إننا بنحقق في الموضوع
إيناس ابتسمت لأول مرة وقالت
كنت مستنية أسمع منك الكلام ده
رجعت الشركة تاني يوم وكأني مش عارفة أي حاجة
أول ما دخلت مكتبي لقيت نادين واقفة عند الباب وماسكة الشنطة الخضرا نفسها
ابتسمتلي ابتسامة مستفزة وقالت
صباح الخير يا مدام كلارا أتمنى تكوني هديتي شوية بعد اللي حصل امبارح
بصيتلها وقلت بهدوء
أنا هديت فعلًا يا نادين وبقيت بشوف حاجات كتير مكنتش واخدة بالي منها
اتغيرت ملامحها للحظة لكنها رجعت ابتسمت وقالت
كويس أصل العصبية مش لايقة على واحدة في منصبك
خرجت من مكتبي وهي بتضحك بخفة لكن قبل ما تقفل الباب سمعتها بتتكلم في التليفون
متقلقش يا ياسين هي لسه مش فاهمة حاجة
وقفت مكاني وأنا سامعة كل كلمة
وبعدها سمعتها بتكمل بصوت أوطى
بس لازم نخلص موضوع الملف قبل ما المحاسب الجديد يراجع الحسابات
أول ما مشيت اتصلت بإيناس وحكيتلها كل اللي سمعته
قالتلي
يبقى إحنا قربنا نوصل للحقيقة بس خلي بالك لأن اللي بيخاف على نفسه ممكن يعمل أي حاجة عشان ينقذها
في نفس اليوم طلبت من مدير الحسابات يراجع المصروفات القديمة من غير ما يبلغ ياسين وفضلت أشتغل على التقارير لحد ما اكتشفت إن فيه شركة اسمها النور للاستشارات بتاخد مبالغ شهرية ضخمة رغم إن مفيش أي عقد حقيقي بينها وبين شركتنا
ولما طلبت ملف الشركة لقيت عنوانها شقة صغيرة في مدينة نصر
بعت سمر تتأكد من العنوان وبعد ساعتين رجعتلي وهي وشها أصفر من الخوف
قالتلي
يا مدام كلارا الشركة دي مش موجودة أصلًا أنا رحت العنوان ولقيت الشقة مقفولة والجيران قالولي إن محدش سكن فيها من شهور
حسيت إن الصورة بدأت توضح قدامي
لكن قبل ما أقدر أتصرف وصلني إيميل من حساب مجهول فيه ملف صوتي ورسالة قصيرة
لو عايزة تعرفي جوزك بيعمل إيه بفلوس الشركة اسمعي التسجيل ده لوحدك
قفلت باب مكتبي ولبست السماعة وشغلت التسجيل
في الأول سمعت صوت نادين وبعدها صوت ياسين واضح وهو بيقول
أول ما كلارا تمضي على التقرير الجديد هنقدر ننقل باقي الفلوس وبعدها محدش هيقدر يثبت علينا حاجة
نادين ردت عليه وهي بتضحك
وإنت متأكد إنها هتمضي
ياسين قال بثقة
كلارا بتثق فيا أكتر من أي حد وأنا عارف إزاي أخليها توافق من غير ما تقرأ كل ورقة
حسيت بدموعي بتنزل غصب عني
مش بس لأنه خانني لكن لأنه كان بيستغل ثقتي فيه عشان يسرق الشركة ويحط الجري\مة على اسمي
وفجأة التسجيل كمل بصوت نادين وهي بتسأله
طيب وإمتى هتسيبها زي ما وعدتني
ياسين سكت لحظة وبعدين قال جملة خلت الدم يتجمد في عروقي
أول ما الفلوس توصل لحسابي بره مصر هطلقها وهخليها هي اللي تتحاكم مكاني
شلت السماعة من ودني وأنا مش قادرة أصدق اللي سمعته
لكن الصدمة الأكبر كانت في آخر التسجيل
صوت راجل تالت دخل في الكلام وقال جملة واحدة خلتني أعرف إن الموضوع أكبر من خيانة جوزي بكتير
