من شوية جتلي مكالمة من المستشفى اللي أبويا محجوز فيها وملخصها إن أبويا غاب وتعالى عشان تخلص اجراءات خروج الجسد، طيب غاب امتا وازاي معرفتش أي تفاصيل مُطلقا، جريت على المستشفى واتصلت بقرايبنا اللي حصلوني على هناك، وعرفت لما وصلت إن أبويا قلبه متحملش ألم المنظار وقلبه توقف وغاب. كانت صدمة ما بعدها صدمة بالنسبالي، مكنتش أتخيل إن الدنيا تافهة ورخيصة للدرجة دي، بس غصب عني كان لازم أتماسك عشان اخواتي البنات، لأن الوقت ده اللي للأسف بتبقا مُجبر انك تكون راجل وتتماسك في وقت انت محتاج فيه تنهار تماما.
وبعد تفكير ومشاورات لقينا الأفضل انه يتغسل في المستشفى ويتكفن وناخده في سيارة نقل خاصة على المدافن على طول، اتصلت بأعمامي وجهزوا المدفن ونادوا في المساجد عشان المشيعين يستنوا عند المدافن. ووصلنا تقريبا على العصر وأبويا متكفن ومحطوط في الخشبة، وقدام المدافن شيلنا الخشبة ودخلنا بيها لحد ما وصلنا للمدفن بتاعنا، نزلنا الخشبة على الأرض وشيلت الجسد ونزلت بيه للمدفن. بس وقتها بدأت الاحظ حاجة كنت شاكك فيها أو يمكن عقلي كان واقف ومش فاهمها، الجسم ده مش جسم أبويا، ولما شيلته اتأكدت تماما انه مش جسم أبويا، الجسم كان لين وناعم كأنه جسم واحدة مش واحد.
حسيت بالذهول ومكنتش عارف أنطق، حطيت الجسد على أرض المدفن وكشفت وشه، كل ده والناس كلهم حولين المدفن، وكانت المفاجأة، بنت شابة، متوفاة، ووقفت مشلول مكاني، هعمل ايه، أقول دي مش جسد أبويا وتبقا فضيحة وقصة كبيرة ونبهدل جسد البنت، ولا أسكت وأواريه هنا وأروح المستشفى اسأل على جسد أبويا.
وبعدين هتكلم أقول ايه، انا أضعف من اني أنطق في موقف زي ده، انا أصلا مش مستوعب اللي شايفه، في اللحظة دي عمي شدني من برة المدفن لأنه كان فاكرني حزين ومش عارف أخرج، محدش فاهم ان انا مصدوم تماما، ولقيت الناس بتدعي وعمي قفل باب المدفن في لحظتها بدون ما يفكر لحظة واحدة، وفضلت في حالة عدم الاستيعاب دي لحد ما خرجنا من المدافن ورجعنا البيت.
أبويا لسة في المستشفى، ولا جسده اتبدل في التجهيز لما كانت بتتجهز، ولا ايه اللي حصل، جريت على المستشفى ودخلت على التجهيز، سألت عن المسؤول وحكيتله اللي حصل، كذبني تماما وخرج الأوراق اللي انا ماضي عليها باستلام جسد أبويا، قولتله مانا استلمت بس جسد تاني، خدني ودخلنا التجهيز اللي مكنش فيها ولا جسد، وقالي ان كل الأجساد خرجت الصبح لأهاليهم.
وعرفت ان انا واريت البنت، وأكيد أهل البنت خدوا أبويا يواروه، يا ترى هياخدوا بالهم ويجوا دلوقتي ونحلها ودي مع بعض ولا ايه، لو وصلوا ممكن نطلع الجسدين ونبدلها، أو نخليها، بس ييجوا، وقعدت قدام تجهيز المستشفى لحد الصبح، وقفلت تليفوني عشان محدش يصدعني، بس مفيش أي حد جه للأسف.
طلعت الصبح لإدارة المستشفى عشان أعرف بيانات الأجساد اللي اتجهزت امبارح، عناوينهم، قالولي ان البيانات سرية ومينفعش تطلع لأي حد، واللي بحكيه ده ممكن يوديني انا في ستين داهية والمستشفى هتتهمني بأخذ جسد من التجهيز غير اني استلمت أبويا وماضي على كدا، ببساطة بتاع الأمن قالي اسكت وكفاية كدا أحسن تورط نفسك في مشكلة كبيرة أوي. ورجعت البيت وانا هتجنن ومش عارف أعمل ايه في المصيبة دي، ده في الأول والآخر أبويا، ومينفعش أسيبه يتوارى في مدفن غريب.
ومن كتر الغم والتفكير نمت في النهاية، وفي نومي شوفت حلم غريب، شوفت أبويا واقف قدام المدفن بتاعه وبيفتح للبنت باب المدفن، وهي قامت وخرجت وكانت بتبكي أوي وهو عمال يحضنها ويطبطب عليها، شوية وقامت مشاورة عليا وشوفت الغضب على وش أبويا بطريقة مشوفتهاش في حياتي. وقمت منفوض من نومي بسبب الحلم الغريب ده، ومبقتش فاهم ايه الجنان اللي شوفته من شوية ده، هل أبويا غضبان لأني واريت واحدة مكانه، وهل انا كدا مُذنب وعملت كارثة في أبويا، هل ممكن أدخل النار بسبب الفِعل ده.
وقعدت أبكي كتير أوي، أبكي لدرجة إني حسيت إن قلبي وجعني من كتر البكاء، وفضلت في الأوضة لتاني يوم، لغينا العزاء ورفضت أقابل أي حد، ومسافة ما نمت فقت على حاجة بتهزني بعنف شديد أوي، قمت مخضوض لقيت أبويا واقف قدام السرير وبيشدني بقسوة، جسمي تقريبا كله اتفكك من بعضه ومقدرتش أقف على رجلي، لقيته بص في عنيا بصة خلتني عامل زي التايه اللي ماشي في الحلم، وخرجت معاه زي فاقد الإدرك لحد ما وصلنا للمدافن وبالأخص للمدفن اللي اتدفنت فيها البنت، لقيته بيديني المفاتيح وكأنه أمر عشان أفتح المدفن، ومكنش قدامي غير إني أنفذ واعمل كدا فعلا.
وفتحت المدفن غصب عني، فتحته ولقيت جسد البنت زي ما حطيته، ساكن تماما، وقفت على باب المدفن وقلبي بيدق وبترعش من الخوف اللي انا فيه، نزلت بهدوء شديد وكشفت عن وش الجسد، مكنتش عارف انا بدور على إيه ولا ايه اللي المفروض الاقيه. بس لما بدأت أكشف أكتر وبالأخص عند الرقبة لقيت أثر من آخر الرقبة لحد آخر البطن بالطول، وكأن البنت دي حد كان فاتح بطنها كلها، وكانت فيه أثر في الجنب اليمين وكمان في الجنب الشمال، ومقدرتش أفسر ده غير بحاجة واحدة بس، البنت دي حد خد أجزاءها كلها، البنت متفرغة وجسمها كله كان مفتوح.
قفلت المدفن وحلفت ما هسكت واللي يحصل يحصل، خرجت لقيت أبويا اختفى تماما وكأنه مكنش موجود، وحكيت لعمي الكبير كل حاجة وخدني وروحنا المركز حكينا هناك كل حاجة، وتاني يوم جت قوة معانا وفتحنا المدفن وشوفنا المشهد بنفس التفاصيل، الجسد راح للجهة المختصة اللي أثبت ان الأجزاء اتاخدت وهي حية، واستدعوا مدير المستشفى والأطباء كلهم. وكانت المصيبة الكبيرة، الناس دول وبالأخص لما بتجيلهم ضحايا حوادث مجهولين الهوية بياخدوا أجزاءهم ويواروهم بتصاريح مزورة، ويشاء ربك ان بالغلط يبدلوا جسد أبويا بجسد البنت، وأبويا يتوارى في مدافن الصدقة مكان البنت والبنت تتوارى عندنا، عشان أشوف كل حاجة واجبلها حقها.
واتشهرت القضية واتحكم فيها بأحكام قاسية أوي، واتشاورنا كلنا في النهاية عشان نشوف هنخرج جسد أبويا ونواريه في مدافننا ولا لا، بس كان القرار انه لا، الراجل اتدفن وخلاص ومش هنحرك جسده تاني، والغريب انه جالي في نفس الليلة وكان مبسوط، ولا كأن فارق معاه تواريه في مدفن غريب بقدر انه فرحان ان حق البنت رجعلها، وقتها بس حمدت ربنا على الصدفة اللي حصلت دي عشان ابقا سبب في رجوع حق بنت مسكينة قرر الشياطين يمسوا جسمها حتى بعد وفاتها.
“وما تدري نفس ماذا تكسب غدا وما تدري نفس بأي أرض تموت” بقلم: أحمد محمود شرقاوي ……. متنساش اللاف والشير للقصة وفولو لو مش متابعني. #دمتم #أحمد_محمود_شرقاوي
